प्रस, परवानीपुर, १४ माघ/
नारायणी क्रिकेट मैदान वीरगंजमा सञ्चालित नेशनल इन्फोटेक कप क्रिकेट प्रतियोगिता अन्तर्गत सोमवार भएको खेलमा ग्लोबल बिजनेश कलेजले हेटौंडा स्कूल अफ म्यानेजमेन्टलाई १११ रन अन्तरले पराजित गरेको छ ।
पहिला ब्याटिङ गर्दै ग्लोबल बिजनेशले निर्धारित २० ओभरमा छ विकेट गुमाएर १७७ रन बनाएको थियो । ग्लोबलका रवीन्द्र कुँवरले ११६ र सुशील स्वर्णकारले १४ रन बनाएका थिए । हेटौंडाका कुशल दुलालले दुई र प्राणञ्जल उपाध्यायले एक विकेट लिए ।
१७८ रनको विजयी लक्ष्यसहित मैदानमा उत्रेको हेटौंडा स्कूल अफ म्यानेजमेन्टले २० ओभरमा नौ विकेट गुमाएर ६६ रनमा सीमित भयो । हेटौंडाका सृजन अधिकारी १५ र भुपेन्द्र यादवले १० रन बनाए । ग्लोबल बिजनेशका रोशन यादवले तीन र आदर्श भण्डारीले दुई विकेट लिए । यस खेलको ‘म्यान अफ दी म्याच’ ग्लोबलका रवीन्द्र कुँवर घोषित भए ।
