प्रस, पर्सागढी, ८ भदौ/
बहुदरमाई नगरपालिका–२ बैरियाका १० वर्षीय सलिम देवान तिलावे नदीमा नुहाउने क्रममा बेपत्ता भएका छन् ।
साथीहरूसँग बहुदरमाई मन्दिरनजीक रहेको तिलावे नदीमा नुहाउन गएका देवान नदीमा डुबेर बेपत्ता भएका हुन् । बेपत्ता देवानको खोजी कार्य जारी छ । सशस्त्र प्रहरीको टोलीले खोजी कार्य गरिरहे पनि देवान अहिलेसम्म फेला परेका छैनन् ।
देवानसँग कतिजना तिलावेमा नुहाउन गएका थिए भन्नेबारेमा यकीन हुन सकेको छैन । स्थानीयले भने तीनजना रहेको दाबी गरेका छन् तर अन्य हराएकाबारेमा भने प्रहरीमा उजूरी परेको छैन ।
प्रस, सर्लाही/
सर्लाहीको ब्रह्मपुरीस्थित रामजानकी मठको पोखरीमा डुबेर शनिवार एक बालकको मृत्यु भएको छ । ब्रह्मपुरी गाउँपालिका–२ का छ वर्षीय अङ्कित साहको डुबेर मृत्यु भएको हो ।
घरनजीकै पोखरी किनारामा नुहाउन बसेका बालक चिप्लिएर पोखरीमा डुबेको हुन सक्ने जिल्ला प्रहरी कार्यालय, सर्लाहीका प्रहरी नायब उपरीक्षक दीपक श्रेष्ठले बताए । डुबेका बालकलाई स्थानीयले तत्कालै पोखरीबाट बाहिर निकाले पनि बचाउन नसकिएको उनले बताए ।
त्यस्तै, सर्लाहीको ईश्वरपुर नगरपालिका–५ सखुवनीस्थित फूलजोर खोलानजीक पानीमा डुबेर एक किशोरको मृत्यु भएको छ ।
सखुवनीमा फूटबल खेल्न साथीसँगै आएका ईश्वरपुर नगरपालिका–४ सागरनाथका १७ वर्षीय निशान थापामगरको नुहाउनका लागि खोलानजीकै नदीजन्य पदार्थ उत्खनन गर्न खनिएको खाल्डोमा जाँदा डुबेर मृत्यु भएको हो । खाल्डो गहिरो भएकोले मृतक किशोरको शव निकाल्न गोताखोर मगाउनुपरेको छ ।
बर्दिबासस्थित वाहिनीबाट गोताखोर टोली घटनास्थलमा आइपुगेको सर्लाहीका सशस्त्र प्रहरी उपरीक्षक विनोदराज खनालले बताए ।
