प्रस, वीरगंज, ३२ जेठ/
कलैया उपमहानगरपालिका–५ बरेवास्थित रामराजा मोहनविक्रम क्याम्पसका प्रमुख हरिभूषण कुशवाहाको गोली हानी हत्या गरिएको छ।
पचरौता नगरपालिका–२ खजुरियाटोल निवासी क्याम्पस प्रमुख कुशवाहा शुक्रवार साँझ साढे पाँच बजे घरबाट कलैया फर्कने क्रममा वडा नं ३ बतरास्थित मन्दिर नजीक चारजना अज्ञात व्यक्तिले घेरा हालेर गोली प्रहार गरेका थिए।
गोली दाहिने कोखामा लागेर घाइते क्याम्पस प्रमुख कुशवाहाको उपचारको क्रममा वीरगंजस्थित वयोधा अस्पतालमा पौने सात बजे निधन भएको छ। बारा प्रहरीका प्रवक्ता प्रहरी नायब उपरीक्षक दधिराम न्यौपानले अज्ञात समूह गोली प्रहार गरेर फरार भएको र प्रहरीले एकजना शङ्कास्पद व्यक्तिलाई नियन्त्रणमा लिएर सोधपुछ गरिरहेको बताए।
