प्रस, वीरगंज, ७ चैत/
जीतपुरसिमरा टी–२० कप क्रिकेट प्रतियोगिता अन्तर्गत बुधवारको खेल वर्षाको कारण स्थगित भएको छ । बिहानैदेखि परेको पानी नरोकिएपछि जनकपुर पिस फाउन्डेशन र खुकुरी क्रिकेट क्लब भैरहवाबीचको खेल स्थगित भएको हो ।
आयोजक अभियान नेपालका संरक्षक त्रिलोकविक्रम शाहले वर्षाका कारण प्रभावित भएको खेल बिहीवार सारिएको बताए । वर्षा नरोकिएपछि बुधवारको खेल बिहीवार र बिहीवारको खेललाई शुक्रवार सारिएको जानकारी दिए ।
राउन्ड रोबिनका आधारमा सञ्चालित प्रतियोगितामा समूह ‘बी’का दुई खेल बाँकी छन् । यस समूहमा मकवानपुर, जनकपुर र भैरहवा छन् । समूह ‘बी’को हिजो मङ्गलवार सम्पन्न पहिलो खेलमा मकवानपुरले जनकपुरलाई ३१ रनले पराजित गरेको थियो । समूहको दोस्रो खेलमा जनकपुर र भैरहवा भिड्नेछन् भने तेस्रो खेलमा मकवानपुर र भैरहवाबीच प्रतिस्पर्धा हुनेछ ।
यस समूहको विजेताले समूह ‘ए’को विजेता पर्सा क्रिकेट सङ्घसँग चैत १० गते फाइनल खेल्नेछ । समूह ‘ए’बाट लगातार दुई खेल जित्दै पर्सा फाइनलमा प्रवेश गरिसकेको छ । आयोजक जीतपुरसिमरा स्पोट्र्स क्लब र कलैया क्रिकेट क्लबलाई पराजित गर्दै पर्सा फाइनलमा प्रवेश गरेको हो ।
