प्रस, परवानीपुर, ७ चैत/
तेस्रो परवानीपुर गोल्डकप फूटबल प्रतियोगिता अन्तर्गत बुधवारको सेमिफाइनल खेल वर्षाका कारण स्थगित भएको छ ।
शक्ति युवा क्लबको आयोजनामा परवानीपुर खेलमैदानमा वर्षाका कारण मैदानमा पानी जमेकोले खेल स्थगित गरिएको आयोजकले जनाएको छ । आजदेखि सेमिफाइनल चरणको पहिलो खेल शुरू हुने तालिका थियो । पहिलो सेमिफाइनलमा वीरगंज युनाइटेड क्लब र वीरगंज युथ एकेडेमीबीच प्रतिस्पर्धा हुने तालिका भएपनि वर्षाका कारण खेल स्थगित भएको प्रतियोगिताका प्रेस संयोजक तिवारी यादवले जानकारी दिए ।
आज स्थगित भएको पहिलो सेमिफाइनल खेल भोलि बिहीवार अपराह्न १२ बजेदेखि हुने उनले बताए ।
यसैगरी, भोलि हुने दोस्रो सेमिफाइनल खेल भने दिउँसो ३ बजेदेखि हुने नयाँ तालिका बनेको उनले बताए । दोस्रो सेमिफाइनल खेलमा हेटौंडा फूटबल एकेडेमी मकवानपुर र बाग्मती फूटबल क्लब सर्लाही भिडनेछन् ।
