प्रस, रौतहट, ५ चैत/
दुर्गाभगवती गाउँपालिका–४ पचरुखीमा सडक विस्तार शुरू भएपछि स्थानीयवासी खुशी भएका छन् ।
दुर्गाभगवती गापा–४ मा सडक साँघुरो भएर आवागमनमा समस्या भएको थियो । अहिले सङ्घ, प्रदेश र गापाको बजेटबाट २० फिटको सडक निर्माण कार्य शुरू भएको छ । गापाध्यक्ष शम्भु सिंहले गापाले विनियोजन गरेको बजेटमा सङ्घ र प्रदेशसमेतको बजेट मिलाएर २० फिटसम्म सडक विस्तार गर्न लागेको बताए ।
उनले बाटो चौडा गरी दुवैतर्फ नाला बनाएर पानीको निकास निकालिने बताए । उनले सडक विस्तार भएपछि चहलपहल बढ्ने बताए । निमित्त प्रशासकीय अधिकृत परमानन्द पाठकले गापामा विकास निर्माणका कार्यहरू तीव्र गतिमा भइरहेको बताए ।
