प्रस, वीरगंज, १७ फागुन/
अल्पाइन अन्तरकलेज टी–२० कप क्रिकेट प्रतियोगिता अन्तर्गत बिहीवार सेमिफाइनल चरणका दुई खेल सम्पन्न भएका छन् ।
आज भएको सेमिफाइनल खेलमा नेशनल एकेडेमीले मिनील्यान्ड र ग्लोबल बिजनेश कलेजले वीरगंज पब्लिक कलेजलाई पराजित गर्दै फाइनलमा प्रवेश गरेका छन् ।
नेशनल एकेडेमीले मिनील्यान्डलाई ५७ रनअन्तरले पराजित गरेको थियो । पहिला ब्याटिङ गर्दै नेशनलले निर्धारित २० ओभरको खेलमा पाँच विकेट गुमाएर १५८ रन बनाएको थियो । प्रतिउत्तरमा १५९ रनको विजयी लक्ष्य पाएको मिनील्यान्ड २० ओभरमा सबै विकेट गुमाएर १०१ रनमा सीमित भयो ।
अर्काे सेमिफाइनल खेलमा ग्लोबल बिजनेश कलेजले वीरगंज पब्लिक कलेजलाई २५ रनअन्तरले पराजित गर्दै फाइनलमा प्रवेश गरेको हो । ग्लोबलले ब्याटिङ गर्दै १९.५ ओभरमा सबै विकेट गुमाएर १५९ रन बनाएको थियो । प्रतिउत्तरमा बिपिसी १७.५ ओभरमा सबै विकेट गुमाएर १३४ रन मात्र बनाउन सक्यो ।प्रतियोगिताको फाइनल खेल फागुन १९ गते शनिवार हुनेछ ।
