काठमाडौं, ७ फागुन/रासस
आइसिसी विश्वकप क्रिकेट लिग–२ को त्रिकोणात्मक शृङ्खला अन्तर्गत सोमवार भएको खेलमा नेदरल्यान्ड्सले नामिबियालाई सात विकेटले पराजित गर्दै प्रतियोगितामा पहिलो जीत दर्ता गराएको छ ।
कीर्तिपुरस्थित त्रिवि क्रिकेट मैदानमा आज भएको खेलमा नामिबियाले प्रस्तुत गरेको १२४ रनको सामान्य लक्ष्य नेदरल्यान्ड्सले २७ दशमलव दुई ओरभमा तीन विकेट गुमाउँदै पूरा ग-यो । यस जीतसँगै नेदरल्यान्ड्सले दुई खेलमा दुई अङ्क जोडेको छ । पहिलो खेलमा नेदरल्यान्ड्स नेपालसँग नौ विकेटले पराजित भएको थियो ।
समान दुई खेल नै खेलेको नामिबियाको पनि समान दुई अङ्क नै छ । पहिलो खेलमा नामिबियाले नेपाललाई चार विकेटले हराएको थियो ।
नेदरल्यान्ड्सको जीतमा माइकल लेभिटले सर्वाधिक ५७ रनको योगदान दिए । उनले ८१ बल खेल्दै आठ चौका र दुई छक्का प्रहार गरे । त्यसैगरी, म्याक्स ओडोउडले २८ रन बनाउँदा बास डी लिडेले अविजित २१ रन बनाए ।
नामिबियाका लागि कप्तान जेर्रार्ड एरास्मसले तीन विकेट लिए । टस हारेर पहिले ब्याटिड्ढो निम्तो पाएको नामिबियाले ३५ दशमलव एक ओभरमा सबै विकेट गुमाउँदै १२३ रनको योगफल बनाएको थियो । नामिबियाका लागि जेजे स्मिथले २६, जान ग्रीनले १९, रुबेन ट्रम्पलम्यानले २०, निकोलस डाभिन र कप्तान जेर्रार्ड एरास्मसले समान १३/१३ तथा बेर्नार्ड स्कोल्ट्जले १२ रन बनाए ।
नामिबियालाई सस्तैमा समेट्नेक्रममा नेदरल्यान्ड्सका आर्यन दत्त एक्लैले छ विकेट लिए भने कायल केलिनले दुर्ई विकेट झारे । त्यस्तै, रोलेफ भान डेर मार्वे र म्याक्स ओडोउडले समान एक/एक विकेट झारे ।
