प्रस, परवानीपुर, १० पुस/
वीरगंजमा जारी सिजी एजुकेशन कपको सेमिफाइनलमा सिमराको लोट्स एकेडेमी प्रवेश गरेको छ ।
ब्राइटर एकेडेमी, सिमरा र लोट्स एकेडेमी, सिमराबीच भएको क्वार्टरफाइनल खेलमा एकका विरुद्ध पाँच गोल गर्दै लोट्स विजयी भएको हो ।
सिजी कपको आयोजक विद्यालय डिपिएसको प्राङ्गणमा रहेको खेलमैदानमा सम्पन्न क्वार्टरफाइनलमा ब्राइटरका तर्फबाट जयराम महतोले एक गोल गरेका थिए भने लोट्सको तर्फबाट दिलकुमार विकले चार गोल एक्लै गरेका थिए ।
उक्त खेलको ‘म्यान अफ दी म्याच’ लोट्सका दिलकुमार विक घोषित भए ।
त्यसैगरी, सिजी कपको बुधवार दुईवटा सेमिफाइनल खेल हुने आयोजकले जनाएको छ ।
विद्यालयका प्रधानाध्यापक रञ्जीव आनन्दका अनुसार पहिलो सेमिफाइनल खेल सोलिडारिटी इन्टरनेशनल, हेटौंडा र डिपिएसबीच र दोस्रो सेमिफाइनल लोट्स एकेडेमी, सिमरा र सिमरा पब्लिक स्कूल, सिमराबीच हुने जनाइएको छ ।
प्रतियोगिताको फाइनल खेल शुक्रवार हुने जनाइएको छ ।
