प्रस, वीरगंज, ३ असार/
सशस्त्र प्रहरी बल प्रस्तावित सीमा सुरक्षा गुल्म भिखमपुरको टोलीले आइतवार बिहान पाँच किलो गाँजासहित दुईजना भारतीय नागरिकलाई पक्राउ गरेको छ।
पक्राउ पर्नेमा पश्चिमी चम्पारण, सोसा ग्राम पञ्चायत निवासी रञ्जीतकुमार साह र हरिकिसुन साह रहेका छन्। आज बिहान नेपालबाट भारततर्फ गइरहेका उनीहरूलाई धोबिनी गाउँपालिकाको आसवारीबाट बिआर २२ एबी २७३२ नम्बरको मोटरसाइकलसहित पक्राउ गरिएको सशस्त्र प्रहरी नायब उपरीक्षक प्रमोद खड्काले बताए।
त्यसैगरी, सीमा सुरक्षा बल महादेवपट्टिको टोलीले एक किलो गाँजासहित एकजना भारतीयलाई पक्राउ गरेको छ। पक्राउ पर्नेमा पश्चिमी चम्पारण गोपालपुर निवासी मजीद मियाँसहित बिआर २२ एपी ८७३५ नम्बरको मोटरसाइकल नियन्त्रणमा लिएको छ।
पक्राउ परेका तीनैजनालाई कारबाईको लागि इलाका प्रहरी कार्यालय, पोखरियाको जिम्मा लगाएको सशस्त्र प्रहरी १३ नम्बर गणले जनाएको छ।a
