पाटन, ३२ जेठ/रासस
इन्डो–नेपाल कराँते प्रतियोगितामा भाग लिन नेपाली टोली भारततर्फ प्रस्थान गरेको छ।
भारतको गाजियाबादमा हुने इन्डो–नेपाल आशिहारा कराँते च्याम्पियनशिपमा भाग लिन बुधवार साँझ नेपाली टोली त्यसतर्फ प्रस्थान गरेको सोसाई मात्सुतात्सु ओयामा कराँते क्योकुसिनकाइकान नेपालका ब्रन्च चिफ दीपक लामाले जानकारी दिए।
यही जून १७ र १८ तारिखमा भारतको उत्तर प्रदेशको गाजियाबादस्थित लीलावती पब्लिक स्कूल प्रताप विहारमा कराँते प्रतियोगिता सञ्चालन हुँदैछ। स्थलमार्ग हुँदै त्यसतर्फ प्रस्थान गरेको टोलीमा १४ खेलाडीसहित २० जना सहभागी छन्।
बुधवार साँझ सोसाई मात्सुतात्सु ओयामा कराँते क्योकुसिनकाइकान नेपालका कार्यवाहक अध्यक्ष रमेश तामाङले प्रतियोगितामा भाग लिन जाने खेलाडीलाई खादा लगाएर शुभकामनासहित बिदाइ गरेका थिए।
