प्रस, वीरगंज, १८ चैत/
सिमरामा जारी जगदम्बा जीतपुरसिमरा गोल्डकपको उपाधि चर्च ब्वाइज युनाइटेडले जितेको छ ।
१३औं संस्करणको उपाधिको लागि आज चर्च ब्वाइज युनाइटेड र दोस्रो संस्करणका विजेता हिमालयन शेर्पाबीचको खेलमा चर्च ब्वाइजले शून्यका विरुद्ध दुई गोलअन्तरले पराजित गर्दै उपाधि जितेको हो ।
फाइनल खेलमा चर्च ब्वाइजका मिलन राईले पहिलो गोल गरे भने दोस्रो गोल सोही क्लबका रञ्जीत पाण्डेले गरेका थिए । चर्च ब्वाइज जगदम्बा जीतपुरसिमरा गोल्डकपमा पहिलो पटक सहभागी भएर उपाधि जित्न सफल भएको छ ।
उपाधि जीतेसँगै चर्च ब्वाइज युनाइटेडलाई उपराष्ट्रपति रामसहाय यादवले १० लाख नगद, शिल्ड, मेडल र प्रमाणपत्र वितरण गरेका थिए । यसैगरी, प्रतियोगिताका उपविजेता हिमालयन शेर्पालाई साढे पाँच लाख नगद, शिल्ड, मेडल, प्रमाणपत्र वितरण गरिएको थियो । जगदम्बा जीतपुरसिमरा गोल्डकप फूटबल प्रतियोगिता चैत ८ गतेदेखि शुरू भएर आज समापन भएको हो ।
