प्रस, वीरगंज, ५ चैत/
चिकित्साशास्त्र अध्ययन संस्थान वीरगंज नर्सिङ क्याम्पसमा स्ववियु निर्वाचन सम्पन्न भएको छ ।
आइतवार सम्पन्न निर्वाचनको मतपरिणाम अनुसार अखिल प्यानलसहित विजयी भएको छ । अखिलबाट अध्यक्षमा मनीषा चौधरी विजयी भएकी छन् । उनले ९१ मत प्राप्त गरी आफ्नो प्रतिद्वन्द्वी नेविसङ्घकी यामिनी खड्कालाई पराजित गरेकी छन् ।
यसैगरी, सचिवमा अखिलकै सृष्टि तिमिल्सिना, कोषाध्यक्षमा अर्चना गुप्ता र सदस्यमा विवेक रणावत तथा मुन्ना श्रेष्ठ विजयी भएका छन् ।
आज भएको निर्वाचनमा कुल मतदातामध्ये दुईजनाबाहेक सबैले मतदान गरेको क्याम्पस प्रशासनले जनाएको छ ।
१५६ जना मतदाता रहेको वीरगंज नर्सिङ क्याम्पसमा निर्वाचनमा १५४ जना सहभागी भएका थिए । दुईजना बाहिर गएकाले सहभागी हुन नसकेको क्याम्पस प्रशासनले जनाएको छ ।
१४ वर्षपछि स्ववियुको निर्वाचन आज भएको हो । यसअघिको निर्वाचनमा यो क्याम्पसमा नेविसङ्घले जितेको थियो ।
स्थापनाकालदेखि अखिलले जित्दै आएको यो क्याम्पसमा गएको स्ववियु चुनावमा नेविसङ्घले एकपटक मात्र जितेको हो ।
वीरगंजको ठाकुर राम बहुमुखी क्याम्पसमा भने विवादका कारण स्ववियु निर्वाचन जेठ १३ गते सारिएको छ ।
