प्रस, वीरगंज, २९ पुष/
एकजना महिलामाथि बिहीवार राति निजकै पतिले साङ्घातिक हमला गरेर घाइते पारेका छन् ।
वीरगंज घर भई हाल कलैयामा बस्दै आएकी सीता पटेललाई उनका पति उमेश साहले धारिलो हतियार प्रहार गरी घाइते बनाएको वडा प्रहरी कार्यालय, श्रीपुरले जानकारी दिएको छ ।
पति साहले केही व्यक्तिहरूसमेत ल्याएर पत्नीमाथि साङ्घातिक हमला गरेको वप्रका, श्रीपुरले जानकारी गराएको छ । घाइते पटेलको उपचार नारायणी अस्पतालमा भइरहेको छ । पतिपत्नीबीच विवाद रहेको र अहिले पारपाचुकेको मुद्दा पनि विचाराधीन अवस्थामा रहेको बताइएको छ । पारपाचुकेको कुरालाई लिएर पतिले हमला गरेको प्रारम्भिक अनुसन्धानबाट खुलेको छ । घाइते सीताको टाउकोलगायत शरीरभरि घाउ छ । घाइते सीताले साहसहित तीनजनाले हमला गरेको प्रहरीलाई बयान दिएको पर्सा प्रहरीका प्रवक्ता प्रहरी उपरीक्षक दीपक गिरीले बताए ।
