प्रस, वीरगंज, ९ मङ्सिर/
नवनिर्वाचित उम्मेदवारलाई उनका कार्यकर्ताहरूले फरक–फरक तरीकाले सम्मान तथा स्वागत गर्नु नयाँ कुरा होइन ।
हामीले हेर्दै आएका छौं, कसैले २ क्विन्टलको माला, चाँदीको मुकुटलगायत उपहारबाट विजयी जनप्रतिनिधिहरूको सम्मान गरिंदै आएको छ ।
सोही अनुसार पर्सा निर्वाचन क्ष्Fेत्र ४ का प्रतिनिधिसभा सदस्य रमेश रिजाल तथा प्रदेशसभा सदस्य शङ्कर चौधरीलाई जिराभवानी गापाको महादेवपट्टिका बासिन्दाले फरक ढङ्गले सम्मान गरेका छन् ।
नवनिर्वाचित दुवैजनालाई त्यहाँका बासिन्दाले नेताहरूको वजन बराबर लड्डुले तौलेर सम्मान गरेका छन् । दुवै नेताको वजन बराबरको लड्डू पछि गाउँमा वितरण गरिएको युवा नेता नवीन सिंहले बताए ।
परिणाम घोषित भएपछि विजयी दुवैले कार्यकर्ता तथा मतदातासँग भेटघाट गर्न जुलूससहित गाउँ परिक्रमा गरेका थिए । सोही क्रममा दुवै नेताहरूलाई सम्मान गरिएको सिंहले बताए । विधायक शङ्कर चौधरी ७५ केजी तथा प्रतिनिधिसभा सदस्य रिजाल ६० केजी रहेको सिंहले बताए ।
