राजेश केशरीवाल, रक्सौल, १७ कात्तिक/
भारत, बिहार, रक्सौल अनुमण्डल अन्तर्गत आदापुर थाना क्षेत्रको मङ्गुरहरा गाउँमा एकजना व्यक्तिको हत्या भएको छ । मृतक सोही गाउँ निवासी २५ वर्षीय अनिल महतो रहेको प्रहरीले जनाएको छ । बुधवार राति हत्या भएको अनिलको शव उनको घरको छतबाट प्रहरीले फेला पारेको थियो । हत्याको आशङ्कामा मृतककी पत्नी, भाउजू र बहिनीलाई प्रहरीले नियन्त्रणमा लिएर सोधपूछ गरिरहेको छ ।
घटनाको दिन अनिल आफूसँग सुतिरहेको र कुन बेला उनी छतमा गएको आफूले थाहा नपाएको प्रहरीसमक्ष निजकी पत्नीले बयान दिएकी छन् । छतबाट प्रहरीले शव फेला पारेको र परिवारका सदस्यमाथि हत्याको आशङ्का रहेको थानाध्यक्ष महेन्द्र कुमारले बताए ।
