प्रस, रौतहट, २ भदौ/
चन्द्रपुर नगरपालिकामा बिहीवार बिहान बसले अटोरिक्शालाई ठक्कर दिंदा तीनजनाको मृत्यु भएको छ ।
काठमाडौंबाट सर्लाहीतर्फ जाँदै गरेको वाग्मती प्रदेश ०३–००१ ख २०१ नम्बरको यात्रीवाहक बसले विपरीत दिशाबाट आउँदै गरेको प्रदेश २–०२–००१ ह २१०९ नम्बरको अटोरिक्शालाई चन्द्रपुर नगरपालिका–२ लच्कामा आज बिहान ठक्कर दिएको थियो । ठक्करबाट अटोमा सवार चारजनामध्ये तीनजनाको अस्पताल लैजाने क्रममा मृत्यु भएको प्रहरीले जनाएको छ ।
सर्लाही–२ सोल्टीका प्रेम ठाडामगर, ढकबहादुर लुङ्गेली मगर र अटो चालक रवि मगरको मृत्यु भएको इलाका प्रहरी कार्यालय, चन्द्रपुरले जनाएको छ ।
सोही घटनामा लुङ्गेलीकी पत्नी सविना लुङ्गेली गम्भीर घाइते भएको तथा दुवै खुट्टामा चोट लागेकाले थप उपचारका लागि न्युरो अस्पताल वीरगंजमा पठाइएको प्रहरी नायब उपरीक्षक सन्तुप्रसाद जैसवारले जानकारी दिए । बसका चालक चन्दनकुमार साहलाई नियन्त्रणमा लिई अनुसन्धान शुरू गरेको उनले बताए ।
