कोलम्बो, ३१ असार/एएनआई
श्रीलङ्कामा देशैभरि बृहत् विरोध प्रदर्शन भइरहँदा शुक्रवार सभामुख महिन्दा यापा अबयवार्देनाले गोटाबाया राजपाक्षले राष्ट्रपतिको रूपमा दिएको राजीनामा स्वीकृत भएको बताएका छन् । “राष्ट्रपतिको राजीनामा स्वीकृत भएको छ । आवश्यक कानूनी प्रक्रियापछि संसद् सदस्यहरूलाई भोलि नयाँ राष्ट्रपति निर्वाचित गर्न आमन्त्रित गरिनेछ,” सभामुख अबेयवार्देनाले एएनआईसँग
भने ।
आन्दोलनकारीको निरन्तरको दबाबलाई साम्य पार्ने प्रयासस्वरूप सम्बोधन गर्दै अबेयवार्देनाले जुलाई १४ देखि राष्ट्रपतिले कानूनीरूपमा आफ्नो कानूनी कर्तव्य र जिम्मेवारीबाट राजीनामा दिएको बताए ।
उनले संसद्द्वारा नयाँ राष्ट्रपति निर्वाचित गर्ने टुङ्गो नलागेसम्म श्रीलङ्काका प्रधानमन्त्री रनिल विक्रेमसिङ्घेलाई अन्तरिम राष्ट्रपतिको रूपमा शपथ दिइने पनि बताए ।
श्रीलङ्काको संविधानको धारा ४० तथा १९८१ को विशेष प्रावधानको ऐन नं २ बमोजिम राष्ट्रपति चयन गरिने अबेयवार्देनाले बताए ।
उनले थपे, “यो प्रक्रिया सफलतापूर्वक र छिटो पूरा गर्ने मेरो मनसाय हो । प्रजातान्त्रिक परम्परालाई पवित्र राख्ने दक्षिण एशियाली क्षेत्रको सबैभन्दा पुरानो प्रजातन्त्र भएकाले यो प्रक्रियालाई पारदर्शी र प्रजातान्त्रिक ढङ्गले पूरा गर्नु श्रीलङ्काको इतिहासमा मात्र नभई विश्वको प्रजातान्त्रिक इतिहासमा पनि एउटा कोसेढुङ्गा हुनेछ ।”
उनले यस लोकतान्त्रिक प्रक्रियामा सहयोग गर्न पार्टीका नेता, राज्य पदाधिकारी र सुरक्षाकर्मीबाट सहयोगको लागि अनुरोध गरे ।
अबेयवार्देनाले भने, “शान्तिपूर्ण वातावरण सिर्जना गर्नका लागि श्रीलङ्काका हाम्रा सम्मानित र प्रिय नागरिकलाई मेरो विशेष अपील छ । यसले संसद्का सबै सदस्यलाई स्वतन्त्रतापूर्वक संसद्मा उपस्थित हुन र आफ्नो अन्तस्करण अनुसार कार्य गर्न अनुमति दिनेछ ।”
सात दिनभित्र राष्ट्रपतिको निर्वाचन प्रक्रियालाई निष्कर्षमा पु¥याउने लक्ष्य रहेको सभामुखले प्रस्ट पारे ।
यसैबीच सिङ्गापुरको परराष्ट्र मन्त्रालयले राजपाक्षलाई निजी भ्रमणमा सिङ्गापुर प्रवेशको अनुमति दिएको पुष्टि गरेको छ । मन्त्रालयले भनेको छ, “उहाँले शरण माग्नुभएको छैन । शरण दिइएको पनि छैन ।”
माल्दिभ्सबाट बिहीवार साँझ साउदी एअरलाइन्सको उडानमा सिङ्गापुर पुगेको स्थानीय सञ्चारमाध्यमले जनाएका छन् ।
राजपाक्ष र उनकी पत्नी सिङ्गापुरमैं रहने र मध्यपूर्वतर्फको थप यात्रा नगर्ने बताइएको छ ।
यसअघि विभिन्न सञ्चारमाध्यमद्वारा सार्वजनिक समाचारमा साउदी एअरलाइन्सको विमान एसभी–७८८ बाट सिङ्गापुर पुगेका श्रीलङ्काका राष्ट्रपति र उनकी पत्नी साउदी अरबको जेदा जाने रिपोर्ट गरिएको थियो ।
जुलाई ९ मा प्रदर्शनकारीको भीडले राष्ट्रपतिको निवासमा आक्रमण गरेपछि ७३ वर्षीय राजपाक्ष देशको कुनै स्थानमा लुकेर बसेका थिए । यसपछि राजपाक्ष आफ्नी पत्नीसँगै सुटुक्क माल्दिभ्सतर्फ गएका थिए । उनले गत बुधवार आफ्नो राजीनामापत्र हस्तान्तरण गर्ने घोषणा गरेका थिए ।
उनको अनुपस्थिति र राष्ट्रपति पदबाट राजीनामापछि मुलुकको संवैधानिक व्यवस्था अनुसार प्रधानमन्त्री रनिल विक्रेमसिङ्घेलाई श्रीलङ्काको अन्तरिम राष्ट्रपति नियुक्त गरिएको थियो ।
गत शनिवार फोर्टस्थित राष्ट्रपति भवनमा हजारौं प्रदर्शनकारी प्रवेश गरी कार्यालय कब्जा गरेपछि राजपाक्ष त्यहाँबाट सुरक्षाकर्मीको सहयोगमा भागेर सुरक्षित स्थानमा गएका थिए । प्रधानमन्त्री रनिल विक्रेमसिङ्घेसमेतले जारी विरोधका बीच आफ्नो पदबाट हट्ने घोषणा गरेका छन् । रासस
