प्रस, वीरगंज, ११ जेठ/
वीरगंज महानगरपालिकाको प्रमुख र उपप्रमुखमा विजयी राजेशमान सिंह र इम्तियाज आलम ठकुराईको अगुवाईमा बुधवार विजय जुलूस निकालिएको छ ।
मङ्गलवार मतपरिणाम घोषणा भएपछि दुवैले छुट्टाछुट्टै जुलूस निकालेका थिए भने आज संयुक्तरूपमा विजय जुलूस निकालिएको हो । वीरगंज महानगरमा सत्तारूढ पाँच दलीय गठबन्धनबाट प्रमुखमा जसपाका सिंह र उपप्रमुखमा नेकाका ठकुराई विजयी भएका हुन् । विजय जुलूसमा मधेस प्रदेशका मुख्यमन्त्री लालबाबूराउत गद्दी, सांसद प्रदीप यादवलगायतको सहभागिता थियो ।
नगरपरिक्रमा गरेको विजय जुलूसमा सहभागी नवनिर्वाचित प्रमुख र उपप्रमुखलाई नगरवासीहरूले फूलमाला, अबीरले स्वागत गरेका थिए । बाजागाजासहित ठूलो सङ्ख्यामा विजय जुलूस निकालिएको थियो ।
