काठमाडौं, २५ फागुन/रासस
बक्सिङ प्रतियोगिताको अपराजित यात्रामा रहेका बक्सर अविरल घिमिरेले ‘हिट प्रोफेशनल किक बक्सिङ प्रतियोगिता’ मा विश्व रेकर्ड कायम गरेका छन् । लगातार १४औं पटकसम्म हिट प्रतियोगितालाई आफ्नो पक्षमा ल्याइ युवापुस्ताका चर्चित बक्सर हिमचितुवा घिमिरेले विश्व रेकर्ड बनाउन सफल भएका हुन् ।
जापानको नायोगा शहरस्थित ‘नायोगा कङ्ग्रेस सेन्टर इभेन्ट हल’मा शनिवार साँझ सम्पन्न सो प्रतियोगितामा हिमचितुवाले थाइल्यान्डका बक्सर विला साकलेकलाई दोस्रो राउन्डमा नै रिङमा ढालेका थिए । उनीहरू दुवै ‘के वान के प्रोफेशनल किक बक्सिङ’ भिडन्त गरिसकेका अनुभवी खेलाडी हुन् ।
सिमुरा डोजोको ५०औं वार्षिकोत्सवका अवसरमा आयोजित सो प्रतियोगितामा हिमचितुवाले तीन राउन्डको कुल १६ मिनेटको खेलमा साकलेकलाई १२ मिनेटमा ढालेका हिमचितुवाका प्रशिक्षक देव घिमिरेले जानकारी दिए । बक्सर देवसहित जापानी बक्सर सिमुरा तामियों र चाउ लोगेट हिमचितुवाको मुख्य प्रशिक्षक रहेका थिए ।
प्रशिक्षक देवका अनुसार अविरलले सिमरा डोजोबाट अन्तर्राष्ट्रिय प्रतियोगितामा खेल्दै आएका छन् । यसअगाडि गत फागुनमा टोकियो शहरमा आयोजित ७० किलोको ‘के वान के प्रोफेशनल किक बक्सिङ प्रतियोगिता’मा जापानी बक्सर दाइ माचुसितालाई पहिलो राउन्डमा नै पराजित गरी बक्सर अविरलले बक्सिङ खेलमा नयाँ रेकर्डसमेत कायम गरेका थिए ।
सो तौल समूहको प्रतिस्पर्धामा लगातार तीनपटक विजयी हुने उनी दक्षिण एशियाकै पहिलो खेलाडीसमेत बनेका थिए । विश्वप्रख्यात सो प्रतिस्पर्धामा उनको विजयको अविच्छिन्न यात्रा जारी छ । गत वर्षको ‘हिट ४९ प्रोफेशनल बक्सिङ च्याम्पियनशिप २०२१’को उपाधि बक्सर खेलाडी अविरलले चुमेका थिए ।
विश्वका युवापुस्ताका चर्चित र अनुभवी बक्सरलाई मात्र रिङमा उतारिने सो अन्तर्राष्ट्रिय प्रतियोगितामा विजयी हुने अविरल पहिलो नेपाली बक्सर बनेका थिए ।
