प्रस, वीरगंज, ११ चैत/
सर्लाहीबाट काठमाडौं जाने यात्रुवाहक बसबाट पथलैया प्रहरीले लागूऔषधसहित एकजना युवकलाई पक्राउ गरेको छ ।
बिहीवार राति जीतपुरसिमरा उपमहानगरपालिका वडा नं १ स्थित पूर्व–पश्चिम राजमार्गमा चेकजाँच गर्दा ना.७ख २६८१ नम्बरको बसको डिक्कीमा लुकाएर राखेको दुई हजार ९९० थान अवैध लागूऔषध पथलैया प्रहरीले बरामद गरेको छ ।
पक्राउ पर्नेमा सर्लाही जिल्ला पर्सा गाउँपालिका–२ संग्रामपुर निवासी २० वर्षीय मिथिलेश कुमार मण्डल रहेका छन् ।
उनीसँग लागूऔषध डाइजेपाम ९९७ थान, फेनारगन १००७ थान र नुर्फिन ९८३ थान बरामद भएको प्रहरीले जनाएको छ ।
पक्राउ परेका मण्डललाई बारा जिल्ला अदालतबाट पाँच दिनको म्याद थप गरी आवश्यक अनुसन्धान भइरहेको प्रहरीले जनाएको छ ।
