सोल, ९ चैत/सिन्ह्वा
दक्षिण कोरियामा कोरोना भाइरसबाट दैनिक झन्डै पाँच लाख नयाँ सङ्क्रमित हुन थालेका छन् । सरकारी अधिकारीहरूले बुधवार दिएको जानकारी अनुसार पछिल्लो एक दिनमा चार लाख ९० हजार ८८१ जना नयाँ सङ्क्रमित थपिएका छन् ।
योसँगै दक्षिण कोरियामा अहिलेसम्म कुल सङ्क्रमितको सङ्ख्या एक करोड चार लाख २७ हजार २४७ पुगेको छ । कोरिया रोग नियन्त्रण तथा व्यवस्थापन निकायका अनुसार यस अघि तीन लाख ५३ हजार ९६८ नयाँ सङ्क्रमित थपिएका थिए ।
कोरोना भाइरसको नयाँ भेरिएन्टका रूपमा देखिएको ओमिक्रोन भाइरसका कारण सङ्क्रमितहरूको सङ्ख्या यसरी अत्यधिक बढेको अधिकारीहरूको भनाइ छ । नयाँ सङ्क्रमितमध्ये एक लाख एक हजार १३३ जना राजधानी सोलका मात्रै रहेको अधिकारीहरूले जनाएका छन् ।
सङ्क्रमितमध्ये एक हजार ८४ जनाको अवस्था गम्भीर रहेको जनाइएको छ । यो सङ्ख्या अघिल्लो दिनको भन्दा २० जनाले कम भएको पनि अधिकारीहरूको भनाइ छ । पछिल्लो एक दिनमा कोरोनाका कारण २९१ जनाको मृत्यु भएको छ । योसँगै कुल मृतकको सङ्ख्या १३ हजार ४३२ पुगेको छ । रासस
