प्रस, वीरगंज, १४ माघ/
जिल्ला प्रहरी कार्यालय, पर्साले दुई स्थानबाट ८१ किलो गाँजासहित चारजनालाई पक्राउ गरेको छ ।
माघ १३ गते राति ८ः३० बजे पर्साको बहुदरमाई नगरपालिका–९ विश्रामपुर मौजे बस्ने ६० वर्षीय गणेश साह कलवारको घरमा छापामारी गरी ७४ किलो गाँजा बरामद गरिएको जिप्रका, पर्साले जनाएको छ ।
प्रहरीले कलवारसहित उनका छोरा ३४ वर्षीय सन्तोष साह कलवारलाई समेत पक्राउ गरी अनुसन्धान शुरू गरेको जनाएको छ ।
यसैगरी, विन्ध्यवासिनी गाउँपालिका–४ अमरपट्टिबाट झौवा जाने बाटोमा सात किलो गाँजासहित एकजना पैदलयात्रीलाई प्रहरीले पक्राउ गरेको छ ।
सखुवाप्रसौनी गापा–१ दोहोरी टोल बस्ने ३५ वर्षीय सुरेश दास र भारत, बिहार, जिल्ला मोतिहारी, भेलाही थाना १ बस्ने ४२ वर्षीय दसाही दासलाई पक्राउ गरेको पर्सा प्रहरीले जनाएको छ । पक्राउ परेका दुवैजनालाई इप्रका, पोखरियाबाट लागूऔषधसम्बन्धी कसूरमा अनुसन्धान अगाडि बढाइएको जिप्रका, पर्साले जानकारी गराएको छ ।
