काठमाडौं, १९ पुस/रासस
नेपाली राष्ट्रिय पुरुष क्रिकेट टोलीको बन्द प्रशिक्षण सोमवारदेखि शुरू भएको छ।
ओमनमा हुने आइसिसी पुरुष टी–ट्वान्टी विश्वकपको ग्लोबल छनोटका लागि नेपाली टोलीका मुख्य प्रशिक्षक पुबुदु दसानायकेले यसअघि ३० सदस्यीय प्रारम्भिक टोली घोषणा गरेको थियो।
जस अनुसार नेपाली टोलीको प्रशिक्षण कीर्तिपुरस्थित त्रिवि क्रिकेट मैदानमा शुुरू भएको हो। त्रिवि मैदानमा पहिलो दिन १४ जना खेलाडी सहभागी थिए। पहिलो दिन टोलीको फिटनेश परीक्षण गर्नुका साथै सामान्य अभ्यास गरेको थियो।
आइतवार राति मात्र होटल पुगेका छजना खेलाडीको पिसिआर परीक्षणको रिपोर्ट नआएका कारण होटलमैं छन्।
कप्तान सन्दीप लामिछाने भने बिग व्यास लिगको लागि अस्ट्रेलियामा छन्। बाँकी नौजना खेलाडी पनि पिसिआर परीक्षणको तयारीमा रहेको क्यानले जनाएको छ।
बन्द प्रशिक्षणमा परेका खेलाडीमा कप्तान लामिछानेसहित ज्ञानेन्द्र मल्ल, दीपेन्द्र सिंह ऐरी, शरद भेषवाकर, करण केसी, सोमपाल कामी, आरिफ शेख, विनोद भण्डारी, कुशल मल्ल, कुशल भुर्तेल, आसिफ शेख र कमल सिंह ऐरी रहेका छन्।
त्यसैगरी, शाहब आलम, सन्दीप जोरा, अविनाश बोहरा, सुशन भारी, पवन सर्राफ, विक्रम सोब, भीम सार्की, रोहितकुमार पौडेल, प्रदीप ऐरी, गुलशन झा, नन्दन यादव, जीतेन्द्रकुमार मुखिया, विवेक यादव, सौरभ खनाल, राजेश पुलामी, किशोर महतो, सागर ढकाल र हरिशङ्कर साह छन्।
