प्रस, परवानीपुर, १३ पुस/
दिल्ली पब्लिक स्कूल, वीरगंजद्वारा आयोजित आठौं संस्करणको सिजी एडुकेशन कपको फाइनलमा सिमराको लोटस एकेडेमी प्रवेश गरेको छ ।
मङ्गलवार विद्यालय परिसरको खेलमैदानमा सम्पन्न पहिलो सेमिफाइनल खेलमा आयोजक विद्यालय डिपिएसलाई एक गोलका विरुद्ध चार गोल गरी लोटस फाइनलमा प्रवेश गरेको हो ।
लोटसको जीतमा दुई गोल प्रहार गरी योगदान गरेका रोहन तामाङ ‘म्यान अफ दी म्याच’ घोषित भएको विद्यालयका सहप्रधानाध्यापक रञ्जीव आनन्दले बताए ।
गत बिहीवारदेखि शुरू भएको फूटबल प्रतियोगितामा पर्साका पाँच र बाराका पाँच गरी कुल १० वटा संस्थागत विद्यालयको सहभागिता छ ।
भोलि बुधवार दोस्रो समिफाइनल खेल साउथ जोन एकेडेमी, वीरगंज र राष्ट्रिय विभूति सामुदायिक शिक्षा सदन, सिमराबीच हुनेछ । प्रतियोगिताको फाइनल खेल शुक्रवार हुने आयोजकले जनाएको छ ।
