प्रस, वीरगंज, ४ मङ्सिर/
साहित्यकार गणेश लाठको वीरगंज–१० आदर्शनगरस्थित घरमा शनिवार प्रभात काव्य–यात्रा सम्पन्न भएको छ ।
लाठको अध्यक्षतामा भएको प्रभात काव्य–यात्रामा प्रतीक दैनिकका प्रधानसम्पादक जगदीशप्रसाद शर्माले प्रभात काव्य–यात्रालाई अगाडि बढाउन सुझाव दिएका थिए । उनले कोरोना सङ्क्रमणमा काव्य–यात्राको केही संस्करण स्थगन भएको थियो भने अबका दिनमा निरन्तरता दिने आग्रह गरे ।
कार्यक्रममा सहभागीहरूले वीरगंजको साहित्यिक गतिविधिलाई उकास्ने माहोल निर्माण गर्ने सुझाएका थिए । पहिलेका दिनमा वीरगंजका साहित्यिक क्षेत्र प्रभावकारी भएपनि अहिले यो क्षेत्रको समुचित विकास हुन नसकेको भन्दै यसको विकासका लागि सबैको सहकार्य हुनुपर्ने बताएका थिए ।
प्रभात काव्य–यात्रामा अमेरिकी नागरिक क्रिस्टिनासहित दिलीपराज कार्की, प्रहरी उपरीक्षक बेलबहादुर पाण्डे, रितेश त्रिपाठी, सुरेश बिडारी, गणेश लाठ, सीताराम पटेल, गीता भण्डारी, अजमत अली, शोभाकान्त झाले नेपाली, भोजपुरी, मैथली, उर्दूमा आआफ्नो रचना वाचन गरेका थिए ।
आगामी प्रभात काव्य–यात्रा मङ्सिर २५ गते प्रहरी उपरीक्षक बेलबहादुर पाण्डेको निवासमा हुने बताइएको छ ।
