प्रस, वीरगंज, १ कात्तिक/
बारा, पर्सा, रौतहट, सर्लाहीलगायत प्रदेश २ का अधिकांश जिल्लामा पेट्रोलियम पदार्थको हाहाकार भएको छ ।
पेट्रोलियम पदार्थ नहुँदा वीरगंज लगायत ग्रामीण क्षेत्रका पेट्रोल पम्पहरू बन्द भएको कारण चालक तथा यात्रीहरूलाई समस्या परेको छ ।
अहिले एम्बुलेन्सलगायत अति जरूरी परेकाहरूले रक्सौलमा पुगी तेल भर्न थालेका छन् । यस विषयमा नेपाल पेट्रोलियम डिलर एसोसिएशनका अध्यक्ष विनोद चौरसियासँग बुझ्दा २ दिनदेखि इन्धन सकिएको बताए ।
आयल निगमका निर्देशक दीपक बरालको निर्देशनमा अमलेखगंज डिपोबाट ८० प्रतिशत इन्धन काठमाडौंलगायत अन्य पहाडी जिल्लामा दशैंको बेला पठाएको चौरसियाले बताए । डिपो खाली रहेकोले अमलेखगंजबाट तेल वितरण बन्द भएको उनले बताए ।
दशैंको कारण कर्मचारी बिदामा रहेकाले भारतबाट इन्धन आएपछि तराईका जिल्लाहरूमा आपूर्ति हुने बताए । आज केही गाडी लोड भएकोले आजदेखि केही पम्पहरूबाट इन्धन वितरण हुने बताए।
