माधव तिमिल्सिना, ठोरी, १९ असोज/
ठोरी गाउँपालिका–४ विजयबस्तीमा जारी स्व रामबहादुर श्रेष्ठ दोस्रो गोल्डकप फूटबल प्रतियोगिता अन्तर्गत मङ्गलवारदेखि शुरू भएको पहिलो क्वाटरफाइनल खेलमा टाइब्रेकरमा वनशक्ति युवा क्लब ठोरी–२ ले हाम्रो फूटबल क्लब, वीरगंजलाई पराजित गरी सेमिफाइनलको यात्रा सुरक्षित पारेको छ ।
निर्धारित समयमा दुवै टीम बराबरीमा खेल सकिएपछि टाइब्रेकरबाट निर्णय गरिएको थियो । टाइब्रेकरमा वीरगंजका दुईजना खेलाडीले गोल गर्न चुकेका थिए । आजको पहिलो क्वाटरफाइनल खेलको ‘म्यान अफ दी म्याच’ वनशक्ति युवा क्लबका गोलरक्षक सागर मगर घोषित भए ।
भोलि दोस्रो क्वाटरफाइनल खेलमा महावीर युवा स्पोट्र्स क्लब, गम्हरिया र वीरगंज युनाइटेड क्लब भिड्ने आयोजकले बताएको छ ।
