प्रस, मकवानपुर, २० भदौ/
शुक्रवार दिउँसो कर्रा खोलामा ट्रकसहित बगाएका दुईजनामध्ये फेला पर्न बाँकी अर्का एकजनाको शव आइतवार फेला परेको छ । घटनास्थलभन्दा करीब डेढ किलोमिटर तल शव फेला परेको हो।
हेटौंडा वडा नं १७ चुच्चेखोला कुमालटारस्थित कर्रा खोला किनारमा शव भेटिएको जिल्ला प्रहरी कार्यालय मकवानपुरले जनाएको छ । फेला परेको शवको सनाखत हुन सकेको छैन । कुमालटारबाट दूध बोकेर डेरीतर्फ जाँदै गरेका स्थानीयले बिहान शव देखेपछि प्रहरीमा खबर गरेका थिए ।
ट्रक बगाउँदा सो ट्रकमा रहेका स्थानीय गणेश थापाको शव घटनाको भोलिपल्ट शनिवार साँझ घटनास्थलभन्दा करीब २०० मिटर तल फेला परेको थियो । थापासँगै ट्रकमा रहेको नाम, ठेगाना थाहा नभएको उनको साथीको शव आइतवार फेला परेको हो ।
शुक्रवार दिउँसो हेटौंडा उपमहानगरपालिका वडा नं १७ रामपुरडाँडास्थित कर्रा खोलाले शिवम सिमेन्ट उद्योगबाट चौघडातर्फ जाँदै गरेको ना.४ख १४४० नम्बरको ट्रकसहित दुईजनालाई बगाएको थियो । सोही दिनदेखि प्रहरी र स्थानीय बासिन्दाले खोजतलाश गरे पनि शव फेला पर्न सकेको थिएन ।
