प्रस, वीरगंज, ३० साउन/
लायन्स क्लबहरूले संयुक्तरूपमा वृक्षा रोपण गर्दै ‘माई लायन्स भिलेज’को शुभारम्भ गरेका छन्।
‘वातावरणलाई बचाऔं’ नारासहित स्वच्छ, सफा र हराभरा अभियान अन्तर्गत शनिवार वृक्षारोपण गरी कार्यक्रम शुभारम्भ गरिएको हो ।
अल लायन्स क्लब अफ वीरगंज, जीतपुर, सिमरा, अमलेखगंज, गंजभवानीपुर र कलैया क्षेत्रका लायन्स क्लबहरूद्वारा संयुक्तरूपमा जीतपुरसिमरा उपमहानगरपालिका वडा नं १० नितनपुरमा वृक्षारोपण गरी माई लायन्स भिलेजको शुभारम्भ गरिएको हो ।
लायन्स क्लब क्षेत्र नं २ का प्रमुख वासु तिमिल्सिनाको अगुवाइमा भएको बृहत् वृक्षारोपण कार्यक्रममा विभिन्न प्रजातिका करीब छ हजार बिरुवा रोपिएको लायन्स क्लब इन्टरनेशनल डिस्ट्रिक्ट ३२५ बी २ का डिस्ट्रिक्ट गभर्नर रामप्रसाद भट्टले जानकारी गराए । उनले लायन्स क्लबहरूले नियमितरूपमा सञ्चालन गर्दै आएका सामाजिक विकासका गतिविधिहरू अन्तर्गत माई लायन्स भिलेज शुभारम्भ भएको बताए ।
वृक्षारोपण कार्यक्रममा सिसौं दुई हजार, टिक दुई हजार, सफेदा १५ सय र आमला पाँच सय गरी छ हजारवटा बिरुवा रोपिएको अभियानमा सहभागी विजय कुशवाहाले जानकारी गराए ।
