प्रस, वीरगंज, ९ साउन/
समाचारको विषयलाई लिएर सञ्चारकर्मीलाई धाकधम्की तथा गाली गलौज गर्ने एकजनालाई प्रहरीले पक्राउ गरेको छ । पक्राउ पर्नेमा जीराभवानी गाउँपालिका–१ स्थित पवित्रा आयल सेन्टरका प्रतिनिधि सञ्जय यादव हुन् ।
घटनाको भिडियो क्लिप र उजूरीको आधारमा इलाका प्रहरी कार्यालयका प्रहरी निरीक्षक रामकाजी थापाको नेतृत्वमा खटेको टोलीले पेट्रोल पम्पबाटै यादवलाई नियन्त्रणमा लिएको हो । घटनाको अनुसन्धानका लागि यादवलाई नियन्त्रणमा लिएको प्रनि थापाले बताएका छन ।
साउन ३ गते प्रतीक दैनिकमा ‘ग्रामीण भेगमा इन्धन तस्करी’ शीर्षकको समाचार प्रकाशित भएको थियो । सोही समाचारका कारण प्रतीक दैनिकका ग्रामीण संवाददाता ओमप्रकाश चौधरीलाई यादवलले गालीगलौज गरेका थिए । गत बिहीवार मोटरसाइकलमा पेट्रोल भराउन पम्पमा पुगेका चौधरीलाई पेट्रोल नदिई धम्की दिंदै यादवले गाली गलोज गरेका थिए ।
प्राप्त सबुत प्रमाण अनुसार दोषी माथि हदैसम्मको कारबाई हुने प्रहरी अधिकारीले बताएका छन्।
