प्रस, वीरगंज, २६ जेठ/
जिल्ला प्रहरी कार्यालय, पर्साले चोरी र लुटपाट घटनामा संलग्न रहेको आरोपमा तीनजना युवकलाई पक्राउ गरेको छ।
वीरगंज महानगर–११ निवासी प्रकाश रौनियारको घरबाट ल्यापटप र मोबाइल चोरी गरेको आरोपमा प्रहरीले जगरनाथपुर गाउँपालिका–६ बस्ने १९ वर्षीय मुन्नाकुमार रामलाई पक्राउ गरेको छ।
यसैगरी, वीरगंज महानगर–११ श्रीपुर बस्ने ४५ वर्षीया शकुन्तला मेहताको सुनको सिक्री लुछ्ने दुईजना युवकलाई पक्राउ गरिएको जिप्रका पर्साले जनाएको छ। जेठ २५ गते मीनाबजारमा तरकारी किन्न आएकी मेहताले घाँटीमा लगाएको सुनको सिक्री लुटेको आरोपमा वीरगंज महानगर–१६ बस्ने १९ वर्षीय नीरज नट र युवराज नटलाई पक्राउ गरिएको प्रहरीले जनाएको छ।
अभियुक्त तीनैजनालाई जिल्ला अदालतबाट पाँच दिने म्याद थमाइ अनुसन्धान भइरहेको प्रहरीले जनाएको छ।
