काठमाडौं, २४ जेठ/रासस
सरकारले कोभिड–१९ विरुद्धको खोप ‘कोभिशिल्ड’ को दोस्रो मात्रा खोपको सट्टामा ‘अस्ट्राजेनिका’ खोप लगाउने भएको छ। कोभिशिल्ड उत्पादक भारतीय कम्पनी सेरम इन्स्टिच्युट र कोभ्याक्स सुविधा दुवैले तत्काल ‘कोभिशिल्ड’ खोप दिन नसक्ने बताएपछि स्वास्थ्य तथा जनसङ्ख्या मन्त्रालयले ‘कोभिशिल्ड’को सट्टामा उस्तै प्रकृतिको खोप ‘अस्ट्राजेनिका’ दिने भएको हो।
स्वास्थ्य सेवा विभाग परिवार कल्याण महाशाखाका निर्देशक डा तारानाथ पोखरेलले भारतबाट कोभिशिल्ड खोप नआए पनि त्यसको विकल्पमा दोस्रो मात्राको खोप अस्ट्राजेनिका लगाइने भएको जानकारी दिए। उनले कोभिशिल्ड र अस्ट्राजेनिका खोप एउटै कम्पनी र एउटै फर्मुलामा बनेकाले लगाउन केही फरक नपर्ने बताए। कहिलेबाट लगाइने भन्ने अझै टुङ्गो लागेको छैन।
खोपको पहिलो मात्रा लगाएको १२ देखि १६ हप्ताबीचमा दोस्रो मात्रा लगाइसक्नुपर्ने हुन्छ। “खोप उत्पादक कम्पनी र कोभ्याक्स सुविधा दुवैले खोप उपलब्ध गराउन असमर्थ भएको पत्र प्राप्त भएकाले तोकिएको मितिमा कोभिशिल्डको दोस्रो मात्रा दिन नसकिएको जानकारी गराउँछौं,” उनले जारी गरेको सूचनामा भनिएको छ, “उक्त खोपको विकल्पमा एउटै प्रकृतिको अस्ट्राजेनिका खोप नेपाललाई प्राप्त भएपश्चात् १२ हप्तापछि पनि सो खोपलाई दोस्रो मात्राका रूपमा लगाउने व्यवस्था मिलाइएको छ।”
उनले अस्ट्राजेनिकाको दोस्रो मात्राको खोपका लागि प्रतीक्षारत रहनसमेत आग्रह गरेका छन्। गत फागुन २३ देखि चैत १० गतेसम्म ६५ वर्षमाथि उमेर समूहका करीब साढे १४ लाख व्यक्तिलाई ‘कोभिशिल्ड’को पहिलो मात्रा लगाइएको थियो। दोस्रो मात्राका लागि खोप नआएपछि अहिले ती व्यक्तिले लगाउन पाएका छैनन्।
सरकार कोभिशिल्ड खोप उत्पादक कम्पनी सेरम इन्स्टिच्युटसँग खरीद गरेको १० लाख मात्रा खोप नआएपछि दोस्रो मात्राको खोप दिन असमर्थ भएको हो। उनले खोपको पहिलो मात्राले पनि कोभिड–१९ रोगबाट बचाउन मदत गर्ने उल्लेख गरेका छन्। नेपालमा अहिलेसम्म करीब २१ लाख १३ हजार ८० जनाले पहिलो मात्राको खोप र छ लाख ९१ हजार १८४ जनाले दोस्रो मात्राको खोप लगाइसकेका छन्। मङ्गलवार मन्त्रालयले ६० देखि ६४ वर्ष उमेर समूहका ज्येष्ठ नागरिकलाई भेरोसिल खोप प्रदान गर्दैछ।
