काठमाडौं, २० जेठ/रासस
नेपालमा पनि कालो ढुसी (ब्ल्याक फङ्गस)का बिरामी भेटिएका छन्। नेपालमा अहिलेसम्म १० जनामा कालो ढुसीको बिमारी पुष्टि भएको जनाइएको छ।
स्वास्थ्य तथा जनसङ्ख्या मन्त्रालयका प्रवक्ता डा कृष्णप्रसाद पौडेलले पुष्टि भएकामध्ये आठजना मन्त्रालयको सम्पर्कमा र अन्य दुर्ई सम्पर्कमा नआएको बताए। उनका अनुसार कालो ढुसीका बिरामी नेपालगंज, वीरगंज र काठमाडौंका रहेका छन्। यस अघि कालो ढुसीका बिरामी भारतमा फेला परेका थिए।
कालो ढुसीले कोभिड–१९ भएका बिरामीको आँखा, नाक र अनुहार बिगार्ने गर्दछ। यो सङ्क्रमण बिरलै देखिने तर सङ्क्रमण गम्भीर भए प्राणघातक हुन सक्ने उनले बताए। अनुहार, मुख, नाक, आँखा वरिपरि दुख्ने, आँखा र नाक सुन्निने, रातो हुने वा दुख्ने, आँखाका ढकनी सुन्निने र ढकनी झुक्ने, ज्वरो आउने, आँखाले धमिलो देख्ने, नाकबाट रगत र बाक्लो सिंगान आउने, दाँत दुख्ने वा हल्लिनेजस्ता लक्षण देखा पर्ने गर्दछ।
कोभिड–१९ जस्तै यो रोग नसर्ने भए पनि ४५ देखि ६५ उमेर समूहका मधुमेह वा शरीरको रोग प्रतिरोधात्मक क्षमता कमजोर भएका र धेरै खाले एन्टिबायोटिक वा स्टेरोइड औषधिको लामो समयसम्म प्रयोग गर्नेलाई कालो ढुसी लाग्ने गर्दछ।
बच्ने उपाय
कालो ढुसीबाट बच्नका लागि सफा र सुक्खा मास्क प्रयोग गर्ने, मास्क धोएर प्रयोग नगर्ने, नियमित हात धुने वा स्यानिटाइजर प्रयोग गर्ने, घर बाहिर वा फोहरमा काम गर्नुपरे डिस्पोजेबल पञ्जा प्रयोग गर्ने, धेरै धूलो भएको र ओसिलो ठाउँमा नजाने, नुनिलो पानीले नाक सफा गर्नुपर्दछ।
यस्तै पोभिडोन आयोडिन भएको तरल पदार्थले कुल्ला गर्ने, जथाभावी एन्टिबायोटिक औषधि सेवन नगर्ने, मधुमेह भएका बिरामीले मधुमेह नियन्त्रण गर्ने र स्वास्थ्यकर्मीको सल्लाहमा मात्र औषधि सेवन गर्नुपर्दछ।
