प्रस, सिराहा, १७ जेठ/
जिल्ला प्रहरी कार्यालय सिराहाले प्रहरी सहायक निरीक्षकसहित तीनजना प्रहरीलाई निलम्बन गरेको छ। उनीहरूले प्रहरी आचरणविरुद्ध काम गरेकाले कारबाई गरिएको जिप्रका सिराहाले जनाएको छ।
निषेधाज्ञा अवधिमा लहान नगरपालिका–२३ स्थित गढिया चोकमा रहेको पूजा मदिरापसलमा मदिरासेवन गर्ने व्यक्तिहरूलाई पक्राउ गर्न गएको प्रहरीले सो पसलबाट मदिरा चोरेको तस्वीर सामाजिक सञ्जालमा भाइरल भएपछि जिप्रका सिराहाले तीनैजना प्रहरीलाई निलम्बित गरेको हो।
जिल्ला प्रहरीका प्रवक्ता एवं प्रहरी नायब उपरीक्षक शालिग्राम शर्माले प्रहरी सहायक निरीक्षक नवलकिशोर ठाकुर, प्रहरी जवानहरू अन्नुकुमार राय र नरेशकुमार रायलाई निलम्बित गरिएको बताए। प्रहरी आचरणविरुद्ध काम गरेको पाइएपछि प्रहरी नियमावली–२०७१ अनुसार दोषी तीनैजना प्रहरीलाई निलम्बित गरी थप अनुसन्धान भइरहेको प्रनाउ शर्माले बताए।
