राजविराज, ९ जेठ/रासस
सप्तरीको डाक्नेश्वरी नगरपालिका–९ रञ्जीतपुरमा आइतवार दिउँसो आगलागी हुँदा पाँच घर जलेर नष्ट भएका छन्। स्थानीयवासी भरत चौधरीको परालको थुप्रोबाट शुरू भएको आगोले निजको एउटा घर, छिमेकी बन्हु चौधरी, उमाकान्त चौधरी, शोभाकान्त चौधरी र लक्ष्मीकान्त चौधरीको घर आगलागीमा परेर नष्ट भएको बोदेबरसाई निवासी उमेशकुमार साहले जानकारी दिए।
उक्त आगलागीमा घर निर्माण गर्न रकम जम्मा पारी बन्हुका घरमा राखिएको करीब रु छ लाखसमेत जलेर खरानी भएको उनले बताए। सो आगोमा एउटा मोटरसाइकल र आफ्नो घरको सम्पूर्ण सामग्री जलेर खरानी भएको शोभाकान्तको भनाइ छ।
अग्निपीडितका अनुसार आगलागीमा घरभित्र रहेका सुनचाँदीसमेत जलेको छ। सो आगलागीमा खाद्यान्न, लत्ताकपडा, भाँडाबर्तन, नगद र घरभित्र रहेका काठ, जस्तापाता, फर्निचरका सामान तथा फ्रिज जलेर खरानी हुँदा करीब रु २५ लाख मूल्यबराबरको क्षति भएको इलाका प्रहरी कार्यालय बोदेबर्साइनले जनाएको छ ।
आगो स्थानीयवासी तथा प्रहरी र नगरपालिकाका वारुणयन्त्रले आगलागी नियन्त्रणमा लिएको जिल्ला प्रहरी कार्यालयले जनाएको छ ।
