प्रस, सिम्रौनगढ, ८ जेठ/
सिम्रौनगढ नगरपालिका-६ सिम्रौनगढका महिलाहरूले शनिवार कोभिडको प्रकोप निस्तेज पार्नका लागि शक्तिपीठमा पूजा अर्चना गरेका छन् ।
कोभिडको प्रकोप क्षीण पार्नका लागि महिलाहरूले बिहान साढे ८ देखि दिउँसो अढाई बजेसम्म साढे ६ घण्टा विधिपूर्वक पूजा अर्चना गरे । स्वास्थ्य मापदण्ड अपनाएर उनीहरूले ब्रह्मस्थान, राजदेवीमाई, कङ्कालीमाईमा पूजा अर्चना गरेका थिए ।
पूजन कार्य पण्डित रामकिशोरले विधिवत् मन्त्र उच्चारण गरेर सम्पन्न गराएका थिए । पूजन कार्यक्रममा स्थानीय परमानन्दप्रसाद जयसवाल, जीयालाल साह कानु, परमानन्द महतो नुनिया, रामप्रसाद ठाकुरलगायतको सहभागिता थियो।
