प्रस, वीरगंज, १८ माघ/
वीरगंज रजतजयन्ती चोकस्थित इन्डो–नेपाल अस्पताल तथा आई केयर सेन्टर प्रालिलाई जिल्ला प्रशासन कार्यालय, पर्साले उन्मुक्ति दिएको छ ।
राजनीतिक दबाबमा जिल्ला प्रशासन कार्यालय, पर्साले अस्पतालले अहिलेसम्म मापदण्ड पूरा गरेर कामकारबाई नगरेको औंल्याए पनि दण्डित नगरेर तीन महीनाभित्र मापदण्ड पूरा गरी सुधार गरेर आउने गरी उन्मुक्ति दिएको छ । मापदण्ड पूरा नगरिएको अवस्थामा जिल्ला प्रशासनले आवश्यक कारबाई गर्नुपर्ने थियो तर दबाब र अर्थ मोहमा उन्मुक्ति दिइएको स्रोतले जनाएको छ ।
जिल्ला प्रशासन कार्यालय, पर्साले गत मङ्सिर १९ गते अस्पतालमा छापा मारेर आवश्यक कागजातहरू नियन्त्रणमा लिएको थियो । प्रशासनले छापा मारेसँगै आर्थिक र राजनीतिक दबाब शुरू भएको हो । दुई महीना लामो अनुसन्धानमा प्रशासनले अस्पतालले पूरा गर्नुपर्ने मापदण्ड पूरा नगरेको ठहर गरे पनि दण्डित नगरेर छोडेको हो । प्रशासनले अस्पताल अनुगमनको क्रममा निर्धारण गर्नुपर्ने शुल्क नतोकेको, काउन्सिलमा दर्ता नरहेका व्यक्तिबाट ल्याब सञ्चालन भएको, क्षमताभन्दा बढी बिरामी उपचार गरेको, जनशक्तिको अभाव रहेको, यान्त्रिक बिलिङ नगरिएको, फार्मेसीको अध्ययन नगरेका व्यक्तिबाट औषधिपसल सञ्चालन गरेको, स्वास्थ्य मापदण्डअनुरूप भवन निर्माण नभएको, पार्किङस्थलको व्यवस्था नगरिएको, १० प्रतिशत बिरामीको निश्शुल्क उपचार गर्नुपर्नेमा सो नगरिएको, कर्मचारीहरूको नियुक्ति र सामाजिक सुरक्ष्Fा कोष कट्टा नगरिएको जस्ता मापदण्ड पूरा नगरेको ठहर गरेर दोषी देखाए पनि कारबाई भने नगरी तीन महीनाभित्र ती सबै मापदण्ड पूरा गर्ने गरी उन्मुक्ति दिइएको हो ।
अस्पताल सञ्चालन तथा स्तरोन्नति मापदण्डसम्बन्धी निर्देशिका–२०७० को दफा १३ उपदफा ६ बमोजिम इन्डो–नेपाल तथा आई केयर सेन्टर सञ्चालन नभएको स्वयम् प्रशासनले ठहर गरेको थियो तर यस सम्बन्धमा दण्डित नगरिएकोमा जिल्ला प्रशासन कार्यालय, पर्साका प्रमुख जिल्ला अधिकारी आसमान तामाङले पहिलोचोटि तीन महीनाको समयसीमा प्रदान गरिएको बताए । उनले सो अवधिमा मापदण्ड पूरा नगरिए नियम अनुसार कारबाई गरिने बताए । यसअघि अस्पतालले मापदण्ड पूरा नगरेको भन्दै कारबाई गर्ने प्रजिअ तामाङले प्रतिक्रिया दिएका थिए । तर दुई महीना अवधिमा प्रजिअले बोली फेरेकाले पनि यो घटनामा आर्थिक तथा राजनीतिक चलखेल भएको देखिन्छ ।
