प्रस, पर्सागढी, २५ कात्तिक/
नेपाली काङ्ग्रेसका केन्द्रीय सदस्य अजय चौरसियाले पार्टी कार्यकर्ताहरूलाई एकजुट भएर पार्टी हितमा लाग्न आग्रह गरेका छन्।
पर्सागढी नगरपालिका–३ स्थित तम्बा छयोलिङ विश्व उद्धार गुम्बामा नेका पर्सागढी नपाले आयोजना गरेको नगरस्तरीय शुभकामना आदानप्रदान तथा समीक्षा गोष्ठीमा कार्यक्रमका प्रमुख अतिथि एवं केन्द्रीय सदस्य चौरसियाले पार्टीमा मतमतान्तर हुनु स्वाभाविक भएपनि त्यसको आडमा गुटबन्दी गरेर राजनीतिक गर्दा पार्टीको हित नहुने बताए। उनले सबैलाई एक भएर पार्टी हितमा लाग्न आह्वान गरे।
पर्सागढी नपाका नगर संयोजक विश्वमोहनदास थारूको अध्यक्षतामा सम्पन्न कार्यक्रममा प्रदेशसभा सदस्य राजेश्वर साह तेली, नगरप्रमुख लोकनारायण यादव, वडाध्यक्ष समसुद्दीन शाह देवान, किसुनदेवप्रसाद यादव, बुथ सभापति जङ्गबहादुर दास थारू, जिल्ला सदस्य सुकमान तामाङ, राजेश्वर यादव, सरजुग साहलगायतले मन्तव्य व्यक्त गरेका थिए।
कार्यक्रमको सहजीकरण लक्ष्मी लामाले गरेकी थिइन्।
