प्रस, सिम्रौनगढ, ७ फागुन/
प्रजातन्त्र दिवसको अवसरमा सिम्रौनगढ नगरपालिका–६ मा शुक्रवार महिला टी–२० क्रिकेट प्रतियोगिता भएको छ। सिम्रौनगढ फूलबारी मैदानमा प्रतियोगिताको उद्घाटन नगरप्रमुख विजयशङ्कर यादवले गरेका थिए।
वडाध्यक्ष शङ्करसाह कानूको अध्यक्षतामा भएको खेलमा कलैया क्रिकेट टीमले राइजिङ क्रिकेट टीमलाई ८ विकेटअन्तरले पराजित ग–यो। टस जितेर पहिलो ब्याटिङ गरेको काठमाडौं राइजिङ क्रिकेट क्लबले निर्धारित २० ओभरको खेलमा १२ ओभरमा अलआउट हुँदै ३५ रन बनाएको थियो। प्रतिउत्तरमा कलैया क्रिकेट क्लबले ८ ओभरमा २ विकेटको क्षतिमा लक्ष्य हासिल गरी ८ विकेटले जीत हासिल गरेको हो।
खेलको वुमन अफ द म्याच कलैया क्रिकेट क्लबकी रोजी कडारी भइन्। उनले प्रतियोगितामा चार विकेट लिएकी थिइन्। आजको प्रतियोगितामा विजयी कलैया क्रिकेट टीमकी कप्तान निशा गिरीलाई नगरप्रमुख यादवले शिल्ड प्रदान गरेका थिए।
