प्रस, परवानीपुर, १३ पुस/
वीरगंज महानगरका प्रमुख विजयकुमार सरावगीले वीरगंज–सौराहा रूटमा टुरिस्ट बस चलाउन आफूले सहयोग गर्ने प्रतिबद्धता जनाएका छन्।
सौराहाका होटल व्यवसायीहरूको वीरगंजमा आयोजित ‘घुमौं सौराहा’ कार्यक्रममा प्रमुख अतिथि नगरप्रमुख सरावगीले यस्तो प्रतिबद्धता जनाएका हुन्। कार्यक्रममा उनले भने, “वीरगंज र सौराहा रूटमा दैनिक दुईवटा बस सञ्चालन गरौं, एउटा वीरगंज महानगरले किन्छ, अर्को रत्ननगर नगरपालिकाले किनोस् मिलेर आन्तरिक पर्यटनलाई प्रवद्र्धन गरौं।” उनले सौराहामा पुरानै शैलीबाट पर्यटन तान्ने कोशिश भएकोले आगामी दिनमा प्राकृतिक सौन्दर्यताका साथै कृत्रिम खेल तमाशा तथा नौला कुराको निर्माण हुनुपर्नेमा जोड दिए।
त्यस्तै, सौराहामा रङ्ग हेरेर पर्यटकसँग गरिने व्यवहारमा परिवर्तन नआएर आन्तरिक पर्यटनको संरक्षण र प्रवद्र्धन हुन नसकेको उनले बताए। उनले भारतीय पर्यटकहरू पनि आन्तरिक पर्यटकजस्तै भएकाले उनीहरूसँग गरिने व्यवहारप्रति सचेत रहनुपर्ने बताए।
कार्यक्रमका विशिष्ट अतिथि रत्ननगर नगरपालिकाका प्रमुख नारायण वनले सौराहामा आगामी दिनमा मधेसका खानेकुरा तथा परिकार र वैवाहिक कार्यक्रमको लागि आवश्यक टेन्ट, केटरिङ र फूल सजावटको व्यवस्थापन मिलाइने बताए। उनले सौराहा मुलुककै प्रमुख पर्यटकीय गन्तव्य भएकोले सौराहामा जबसम्म भारतीय पर्यटकको चाप बढ्दैन, तबसम्म सौराहाको पर्यटन व्यवसाय राम्रो नहुने चर्चा गर्दै स्वास्थ्य मापदण्ड अपनाएर नेपाल–भारत सीमा तत्काल खोल्नुपर्नेमा केन्द्र सरकारसँग पहल हुनुपर्ने बताए। उनले टुरिस्ट बसको लागि पनि दुवै नगरपालिकाले मिलेर बस सञ्चालन योजना अघि बढाउने जनाए।
वीरगंज उद्योग वाणिज्य सङ्घका अध्यक्ष गोपाल केडियाले पहिले फस्ट जनवरी मनाउन २७ डिसेम्बरदेखि नै भारतीय पर्यटकको लाइन लाग्ने गरेकोमा अहिले सीमा बन्द हुँदा खासै पर्यटक नआएको जिकिर गरे। उनले नेपाल–भारत सीमा बन्द हँुदा सबैभन्दा बढी होटल तथा पर्यटन व्यवसाय प्रभावित भएको र यसको असर कृषि, उद्योग, व्यापार, आयात– निर्यात, यातायात, रोजगार सबै क्षेत्रमा परेको बताए। भिजिट मधेस नेपालका अध्यक्ष ओमप्रकाश सर्राफले तराई–मधेस र पहाडी रीतिरिवाज, खानपिनबीच तालमेल मिलाएमा पर्यटनको प्रवद्र्धन हुने बताए।
क्षेत्रीय होटल सङ्घ नेपालका पूर्वअध्यक्ष सुमन घिमिरेले आन्तरिक पर्यटनलाई प्रवद्र्धन गर्न सौराहाका होटल व्यवसायीले कोठामा २० देखि ४० प्रतिशत र रेस्टुराँमा ३० प्रतिशतसम्म छुट दिने गरेको बताए।
क्षेत्रीय होटल सङ्घ नेपालका अध्यक्ष दीपक भट्टराईको अध्यक्षता तथा महासचिव गुणराज थपलियाले सहजीकरण गरेको कार्यक्रममा होटल तथा पर्यटन व्यवसायी सङ्घ वीरगंजका अध्यक्ष हरि पन्त, नेपाल पत्रकार महासङ्घ प्रदेश २ का अध्यक्ष दीपेन्द्र चौहान, व्यवसायी प्रकाश खण्डेलवाललगायतले मन्तव्य व्यक्त गरेका थिए।
कार्यक्रममा वीरगंजका उद्योगी–व्यवसायी, होटल व्यवसायी, सञ्चारकर्मीलगायतको सहभागिता थियो। सौराहाका होटल व्यवसायीहरूले चार दिनअघि धरान, विराटनगर, जनकपुरपछि वीरगंजमा कार्यक्रम गरी सौराहा फर्केका छन्। उनीहरूले अब पश्चिम नेपालमा कार्यक्रम गर्ने जनाएका छन्।
