प्रस, वीरगंज, ३० मङ्सिर/
वीरगंज मुख्य सडकको करोडौं मूल्यको जग्गा किर्ते नामसारी प्रकरणमा मङ्गलवार पर्सा जिल्ला अदालतमा पक्राउ परेका ६ जनाविरुद्ध थुनछेक बहस भयो।
पर्सा जिल्ला अदालतका न्यायाधीश हरिकृष्ण श्रेष्ठको इजलासमा आज भएको थुनछेक बहसमा वादी राजीव राजभण्डारीको तर्फबाट जिल्ला न्यायाधिवक्ता पद्मबहादुर कार्की र अधिवक्ता सुधीर कर्णले बहस गरेका थिए। यसैगरी, प्रतिवादीको तर्फबाट आज अधिवक्ता वीरेन्द्र यादवले मात्र बहस गर्न सके। बाँकी कानून व्यवसायीहरूले बुधवार थुनछेक बहस गर्ने बताइएको छ।
आइतवार र सोमवार दुई दिन पक्राउ परेका ६ जनासँग बयान लिने काम सम्पन्न भएपछि आज मङ्गलवारदेखि थुनछेक बहस भएको हो।
जग्गा किर्ते नामसारी प्रकरणमा मालपोत कार्यालय, पर्साका प्रमुख सुमन झा, नासु श्रीनारायणप्रसाद साह, लेखनदासद्वय प्रमेश र अमरप्रसाद साह कानू, जग्गा कारोबारी विश्वास तिवारी र किर्तेका नाइके केवलप्रताप राणा पक्राउ परेका छन्।
यही घटनामा पर्सा प्रहरीले पक्राउ गरेको व्यवसायी गिरधारीलाल अग्रवाललाई जिल्ला न्यायाधिवक्ताको कार्यालयले मुद्दा मुतल्वी राखेर रिहा गरेको थियो।
