काठमाडौं, १८ फागुन/रासस
लामो समयदेखि प्रतिनिधिसभा अवरुद्ध हुँदा लज्जाबोध भएको सत्ता घटक दलहरूले बताएका
छन् ।
प्रतिनिधिसभाको आजको बैठकपछि पत्रकारसँग कुरा गर्दै नेताहरूले सर्वाेच्च अदालतमा विचाराधीन विषयमा संसद्मा कुरा उठाउन नपाइने कानूनी व्यवस्थाको उल्लङ्घन गर्दै संसद् अवरुद्ध गर्नु नाजायज भएको बताएका छन् ।
नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले प्रतिपक्ष दल नेकपा (एमाले) लाई सङ्केत गर्दै संसद् खुलाउन सद्बुद्धि आउनुपर्ने बताए ।
“यसले लोकतान्त्रिक प्रतिबद्धताप्रति नै प्रश्न खडा गरेको र स्वयं उक्त पार्टीको प्रतिष्ठा खस्किएको छ”–उनले भने–“यसको मूल्य आगामी निर्वाचनमा चुकाउनुपर्ने अवस्था आउन सक्छ ।”
जनता समाजवादी पार्टी नेपाल (जसपा) सङ्घीय परिषद्का अध्यक्ष पूर्वप्रधानमन्त्री डा बाबुराम भट्टराईले भने–“यसरी संसद् चलिरहनु र ६ महीनादेखि बन्धक हुनु दुःखद हो, मलाई लज्जाबोध भइरहेको छ, जनताका प्रतिनिधि हामी आउँछौं, हस्ताक्षर गर्छाैं, भत्ता बुझेर हिंड्छौं, यो राम्रो काम होइन ।” उनले अवरोध खुलाउनसमेत प्रतिपक्षी दललाई आग्रह गरे ।
नेपाली काङ्ग्रेसका नेता कानून न्याय तथा संसदीय मामिलामन्त्री दिलेन्द्रप्रसाद बडूले परिस्थितिलाई ख्याल गरेर अत्यावश्यक कारबाई चलिरहे पनि प्रतिपक्षी दलको एकतर्फी नाराबाजी उपयुक्त नभएको बताए । संविधानको धारा, १०५ अनुसार अदालतमा विचाराधीन हुँदाहुँदै संसद्मा उठाउनै नसकिने विषय उठिरहेकोमा उनले चिन्ता प्रकट गरे ।
मन्त्री बडूले भने–“सभामुख प्रमुख प्रतिपक्षी दलको ध्यानाकर्षण गराइरहनुभएको छ, हामी चाहन्छौं यो अवस्था अन्त्य होस्, सबैको सहभागितामा जनताको विषयको सम्बोधन होस्, हामी आग्रह गरिरहेका छौं ।”
नेकपा एमालेले प्रतिनिधिसभाका १४ सांसदलाई कारबाईका लागि निर्णय गरेर पत्र पठाए पनि सभामुखले कारबाई नगरेको भन्दै संसद् अवरोध गर्दै आएको छ ।
सत्तापक्ष गम्भीर भएनः एमाले
नेकपा (एमाले) का उपाध्यक्ष सुवासचन्द्र नेम्वाङले प्रमुख प्रतिपक्ष दल संसद्को ‘वेल’मा गएको विषय सत्तापक्षका लागि गम्भीर विषय नै नभएको जिकिर गरे । उनले भने–“उहाँहरूले आनन्द मानिरहनुभएको छ, यो विषयमा सत्तापक्ष गम्भीर छैन, हामी बारम्बार भनिरहेका छौं, हामीले उठाएका विषयमा गम्भीर हुनुप¥यो ।” उनले संसद् अवरोध रहर नभई बाध्यता भएको पनि
बताए ।
संसद्को नेता भनेको सभामुख अग्निप्रसाद सापकोटा रेफ्री भए पनि उनले हाम्रै पोस्टभित्र गोल हानेकाले अप्ठेरो स्थिति सिर्जना भएको नेता नेम्वाड्ढो भनाइ छ ।
