प्रस, वीरगंज, २१ पुस/
वीरगंज महानगरपालिका–१५ शिरोमणि टोल अन्तर्गत सडकपेटीमा पार्किङ गरिराखिएको मोटरसाइकल चोरी गरी भाग्ने क्रममा हिजो मङ्गलवार दुईजना चोर पक्राउ परेका छन् ।
सिम्रौनगढ–४ निवासी हाल वीमनपा–१५ बस्ने आर्यन गुप्ताको मोटरसाइकल चोरी गर्ने क्रममा उनीहरूलाई पक्राउ गरेको प्रहरीले जनाएको छ ।
पक्राउ पर्नेमा वीमनपा–१५ निवासी २० वर्षीय अवधेश महतो र सोही ठाउँ निवासी सुवास तिवारी रहेको प्रहरीले जनाएको छ ।
यस्तै, मोटरसाइकलधनी दीलिप पाण्डेको घण्टाघरनजीक पार्किङ गरिराखेको मोटरसाइकल चोरी गरिरहेको अवस्थामा त्यहाँ खटिएका प्रहरीले एकजना चोरलाई पक्राउ गरेको छ ।
पक्राउ परेका १९ वर्षीय सबिन चौधरी कोल्हवी नपा–९ निवासी हुन् । पक्राउ परेका तीनैजनालाई प्रहरीले जिल्ला अदालतबाट पाँच दिन म्याद थप गरी अनुसन्धान भइरहेको जनाएको छ ।
