प्रस, जीतपुर, १ पुस/
सिमरामा जारी अन्तरविद्यालय स्तरीय फूटबल प्रतियोगिताको फाइनलमा लोटस एकेडेमी, सिमरा पुगेको छ । सिमरा रङ्गशालामा बिहीवार सम्पन्न अन्तिम सेमिफाइनल खेलमा लोटस एकेडेमीले राष्ट्रिय विभूति शिक्षा सदन, डुमरवानालाई फराकिलो गोलअन्तरले हराउँदै फाइनलमा प्रवेश गरेको हो ।
लोटसका आकाश मोक्तान एक्लैले चार गोल गरेका थिए । विवेक बुढाथोकीले थप एक गोल गर्दै लोटसलाई ५–० को फराकिलो गोलअन्तरले जीत दिलाएका थिए ।
आजको खेलको ‘म्यान अफ दी म्याच’ आकाश मोक्तान घोषित भए । प्रतियोगिताका संयोजक सोनु क्षेत्रीले उपाधिका लागि शनिवार लोटस एकेडेमी र नेरामावि, बकुलियाबीच भिडन्त हुने बताए ।
