प्रस, वीरगंज, २८ मङ्सिर/
नेपाल राष्ट्र बैंक कर्मचारी सङ्घ, वीरगंजको आयोजनामा मङ्गलवारदेखि अन्तरबैंक सेभेन साइड फूटबल प्रतियोगिता शुरू भएको छ।
आदर्शनगर रङ्गशालामा नेपाल राष्ट्र बैंक कर्मचारी सङ्घ, वीरगंजका अध्यक्ष कृष्णकुमार श्रेष्ठको अध्यक्षतामा भएको प्रतियोगिताको उद्घाटन नेपाल राष्ट्र बैंकका डेपुटी गर्भनर बमबहादुर मिश्रले गरेका थिए। उद्घाटन खेलमा आयोजक नेपाल राष्ट्र बैंक, वीरगंज १–० गोलअन्तरले विजयी भयो। नेपाल इन्भेस्टमेन्ट बैंकलाई शून्यका विरुद्ध एक गोल गरी आयोजक नेपाल राष्ट्र बैंक उद्घाटन खेलमा विजयी भएको हो। भोलि प्रतियोगिता अन्तर्गत तीनवटा खेल हुनेछन्। जसमा एनसिसी बैंक र प्राइम बैंक, सिटिजन्स बैंक र कर्पोरेट डेभेलपमेन्ट बैंक तथा एनआईशी एशिया र नेपाल बैंक लिमिटेडबीच हुनेछ।
आजदेखि शुरू भएको अन्तरबैंक सेभेन साइड फूटबल प्रतियोगिता पुस २३ गतेसम्म सञ्चालन हुने र प्रतियोगितामा वीरगंजका २३ वटा बैंक तथा वित्तीय संस्थाको सहभागिता रहेको आयोजक नेपाल राष्ट्र बैंक, वीरगंजले जनाएको छ।
