प्रमोद यादव, पचगावाँ, २९ कात्तिक/
सबडिभिजन वन कार्यालय सबैयाको टोलीले नौ थान साइकलसहित तीन स्थानबाट ठूलो परिमाणमा सालको काठ बरामद गरेको छ ।
सबैयाका फरेस्टर पुरुषोतम पटेल नेतृत्वको वन गस्ती टोलीले पर्सागढी नगरपालिका–४ भेडाहा चोकबाट सातवटा साइकलमा लोड १८ क्युफिट सालको काठ पक्राउ गरेको जनाएको छ । सूचनाको आधारमा वन गस्ती टोलीले वीरगंज महानगरपालिका–३१ भेडियाहीबाट २८ क्युफिट सालको काठ बरामद गरेको थियो ।
आइतवार राति ११ बजे शेख छेदी मियाँको मूलगेटछेउमा थाक बनाएर त्रिपालले छोपेर राखेको अवस्थामा २८ क्युफिट सालको काठ बरामद भएको थियो । यसैगरी, सोमवार बिहान ७ बजे वीरगंज–३१ बेल्वाटोलमा छापामारी गर्दा १४ क्युफिट दुई थान सालको गोलिया बरामद भएको थियो । तीनवटै स्थानबाट नौ थान साइकल र ६० क्युफिट सालको काठ बरामद भएको र बरामद साइकल तथा काठ सबडिभिजन वन कार्यालय सबैयामा राखिएको फरेस्टर पटेलले बताए ।
