प्रस, वीरगंज, २३ कात्तिक/
पर्सा प्रहरीले हुन्डी कारोबार गरेको अभियोगमा एकजनालाई पक्राउ गरेको छ। सोमवार बारा, विश्रामपुर गापा–५ नकटुवा बस्ने वर्ष ३१ का चन्दनकुमार साहलाई पक्राउ गरेको पर्साका प्रहरी उपरीक्षक बेलबहादुर पाण्डेले जानकारी गराए।
उनका अनुसार पूर्व सूचनाको आधारमा हिजो दिउँसो साढे १ बजे वीरगंज घण्टाघरबाट आदर्शनगर जाँदै गरेको ना.४८ प. ७६९१ नम्बरको मोटरसाइकलको खानतलाशी गर्दा उनले बोकेको झोलाबाट स्रोत नखुलेको २० लाख नेपाली रुपियाँ फेला परेकोले नियन्त्रणमा लिइएको हो। उनीमाथि बैंक तथा वित्तीय संस्थासम्बन्धी ऐन, २०७३ विरुद्व कसूरमा अनुसन्धान अगाडि बढाइएको पर्सा जिल्ला प्रहरी कार्यालयले जनाएको छ।
