–सिबी अधिकारी
काठमाडौं, २१ कात्तिक/रासस
गौतमबुद्ध अन्तर्राष्ट्रिय विमानस्थलको यान्त्रिक परीक्षण उडान (क्यालिब्रेशन फ्लाइट) गर्न थाइल्यान्डको एरो थाईले अनुमति पाएको छ।
नेपाल नागरिक उड्डयन प्राधिकरणले पूर्व सम्झौता अनुरूप एरो थाईलाई क्लालिब्रेशन फ्लाइट गर्न अनुमति दिएको हो।
राष्ट्रिय गौरवको आयोजनाका रूपमा रहेको भैरहवा (रूपन्देही) मा निर्माण गरिएको गौतमबुद्ध विमानस्थल क्यालिब्रेशन फ्लाइटका लागि तयारी अवस्थामा छ। क्यालिब्रेशन फ्लाइट भनेको विमानस्थलमा विमान उडान र अवतरणका साथै अन्य कार्य निर्देशित गर्न धावनमार्ग, टावरलगायत क्षेत्रमा जडान भएका उपकरणले काम गरेका छन् या छैनन् भनेर परीक्षण गर्ने प्रक्रिया हो। यसका लागि जहाज नै ल्याएर उडान अवतरण गर्नुपर्छ।
एरो थाईले क्लालिब्रेशन फ्लाइट गर्ने अनुमति पाएसँगै परीक्षण उडानको सम्पूर्ण तयारी अन्तिम चरणमा पुगेको प्राधिकरणका महानिर्देशक राजकुमार क्षत्रीले जानकारी दिए। उनका अनुसार अबको एक महीनाभित्रै परीक्षण उडान हुनेछ। त्यसबीच प्राधिकरणले आन्तरिक तयारी गर्नेछ। एरो थाई थाइल्यान्डको प्रतिष्ठित हवाई कम्पनी हो। थाई एयरवेजका लागि एटिसिलगायत प्राविधिक जनशक्ति एरो थाईले उपलब्ध गराउने गरेको बताइन्छ। आगामी नोभेम्बर २२ तारिखमा एरो थाईले प्राविधिक जनशिक्तसहित नेपालमा जहाज ल्याएर प्रक्रिया पूरा गरी क्लालिब्रेशन फ्लाइट गर्ने प्राधिकरणले जनाएको छ। यो काम एक साता अवधिको हुनेछ।
कोभिड–१९ महामारीका कारण अघिल्लो वर्ष नै उदघाटन गर्ने भनिएको उक्त आयोजना केही विलम्ब भएको थियो। संस्कृति, पर्यटन तथा नागरिक उड्डयनमन्त्री प्रेमबहादुर आलेको निर्देशनबमोजिम प्राधिकरणले क्लालिब्रेशन फ्लाइटको टुङ्गो लगाएको हो।
महानिर्देशक क्षत्रीले भूकम्प, नाकाबन्दी तथा ठेकेदारले बेलैमा पैसाको जोहो र निर्माण सामग्री गर्न नसक्नुले पनि आयोजना सम्पन्न हुन ढिलाइ भएको छ। स्थानीय तहसँग समन्वय गर्न नसक्नु तथा पछिल्लो कोभिड–१९ महामारीका कारण आयोजना प्रभावित बन्यो। क्यालिब्रेशन फ्लाइट विदेशीलाई पैसा तिरे पनि, गुहार्नुपर्ने कारणले पनि आयोजना ढिलो भएको उनले बताए। महाप्रबन्धक क्षत्रीले भने–“गौतमबुद्ध विमानस्थलको प्राविधिक प्रक्रिया लगभग पूरा गरिसकेका छौं, तुरून्त गर्नुपर्ने केलिब्रेशन फ्लाइट अबको एक महीनाभित्रै सक्छौं। त्यसको तीन महीनाभित्र परीक्षण उडान गरी अर्काे पाँच महीनाभित्र व्यावसायिक प्रयोजनका उडान सञ्चालनमा ल्याउने योजना छ।”
परीक्षण उडान गरेपछि अन्तर्राष्ट्रिय वायुसेवालाई नियमित उडानका लागि आह्वान गरिने उनको भनाइ छ। गौतमबुद्ध अन्तर्राष्ट्रिय विमानस्थलमा अबको पाँच महीनामा अन्तर्राष्ट्रिय उडान हुने जनाइएको छ। विमानस्थलको टेक्निकल स्टाटस (प्राविधिक स्थिति) को काम लगभग सकिसकेकोले अबको पाँच महीनामा अन्तर्राष्ट्रिय उडान हुने महानिर्देशक क्षत्रीले बताए।
गौतमबुद्ध विमानस्थल अङ्ग्रेजी वर्ष सन् २०२१ को शुरूबाट सञ्चालनमा ल्याइने जनाइएको थियो। सन् २०१७ डिसेम्बरभित्र निर्माण सक्नेगरी सन् २०१५ को शुरूमा थालनी भएको विमानस्थलको काम बीचमा ठेकेदार कम्पनीको लापरवाहीले अवरुद्ध भएको थियो। पछि थपिएको दुई वर्षको अवधिमा आयोजनाको काम उल्लेख्यरूपमा प्रगति भयो।
पछिल्लोपटक सन् २०२० को मार्च महीनासम्मका लागि विमानस्थलको निर्माण अवधि थपिएको थियो। प्राविधिक कारणले ढिलाइ भएको उक्त आयोजनालाई कोरोनाको सन्त्रासले थप विलम्ब बनाएको हो। विमानस्थल चिनियाँ निर्माण कम्पनी नर्थवेस्ट सिभिल एभिएशन कन्स्ट्रक्शन ग्रुपले निर्माण गरेको हो। एशियाली विकास बैंकको सहुलियतपूर्ण ऋणमा निर्माण भएको उक्त आयोजनाका लागि दुवै चरणमा गरी रु सात अर्ब ३२ करोड हाराहारी खर्च हुने प्राधिकरणले जनाएको छ।
कुल ४५ मिटर चौडाइ र तीन हजार मिटर लामो धावनमार्गको यो विमानस्थललाई व्यावसायिक सञ्चालनमा आउँदा हालको त्रिभुवन अन्तर्राष्ट्रिय विमानस्थलको चाप न्यूनीकरण हुने विश्वास लिइएको छ। प्राधिकरणका अनुसार हाल ८० प्रतिशत भौतिक प्रगति सकिएको पोखरा क्षेत्रीय अन्तर्राष्ट्रिय विमानस्थल पनि अबको छ महीनामा परीक्षण उडान हुनेगरी तयारी भइरहेको जानकारी दिंदै एक वर्षभित्र अन्तर्राष्ट्रिय उडान सञ्चालन गरिने बताए।
त्रिभुवन अन्तर्राष्ट्रिय विमानस्थलमा रु २०० हजार पिसिआर शुल्क लिएको पाइएपछि पर्यटनमन्त्रीले विमानस्थलको छड्के निरीक्षण गर्दै शुल्क घटाउन निर्देशन दिएका थिए। सोही अनुरूप विमानस्थलमा पिसिआर परीक्षण गर्दा लाग्ने शुल्क दुर्ई हजारबाट एक हजार २०० कायम गरिएको महानिर्देशक क्षत्रीले बताए। आन्तरिक विमानस्थलको सुदृढीकरण गर्दै आवश्यकताका आधारमा विमानस्थल सञ्चालन गर्न तथा धनगढीलगायत विमानस्थलको स्तरोन्नतिको काम पनि शुरू भइसकेको प्राधिकरणले जनाएको छ।
