माधव तिमिल्सिना, ठोरी, १६ असोज/
ठोरी गाउँपालिका–४ विजयबस्तीमा जारी स्व रामबहादुर श्रेष्ठ गोल्डकप फूटबल प्रतियोगिताको क्वाटरफाइनल समीकरण पूरा भएको छ । शनिवार सम्पन्न पहिलो चरणको अन्तिम क्वाटरफाइनल खेलमा सुवर्ण युवा क्लब ठोरी गापा–५ ले वसन्तपुर युनाइटेड माडी, चितवनलाई शून्यका विरुद्ध तीन गोलअन्तरले पराजित गरेको छ । आजको खेलमा जीत हासिल गर्दै सुवर्ण युवा क्लब ठोरी गापा–५ क्वाटरफाइनलको ८ टिममा पर्न सफल भएको छ ।
खेलमा सुवर्णपुरका तर्फबाट विदेशी खेलाडी एफिजोलाले मध्यान्तरअघि एक गोल गरेका थिए भने मध्यान्तरपछि पनि उनैले एक गोल थपेका थिए । यस्तै, सुवर्णपुरकै तर्फबाट अर्का विदेशी खेलाडी एटिलोजाले मध्यान्तरपछि एक गोल थप्दै माडीलाई पहिलो चरणमा रोक्न सफल भए ।
आजको खेलको म्यान अफ दी म्याच सुवर्ण युवा क्लब ठोरीका विमल रानामगर घोषित भए ।
यसैबीच, असोज १९ गतेदेखि शुरू हुने क्वाटरफाइनल खेलमा हाम्रो फूटबल क्लब, वीरगंज र वनशक्ति युवा क्लब ठोरी सेमिफाइनल प्रवेशका लागि भिड्नेछन् । असोज २० गते महावीर युवा स्पोट्र्स क्लब, गमहरिया र वीरगंज युनाइटेडबीच अन्तिम चारमा प्रवेशका लागि प्रतिस्पर्धा हुने आयोजकले जनाएको छ ।
यसैगरी, निर्मल समाज युवा क्लब, ठोरी–४ र युनाइटेड सिमरा, बाराका बीच असोज २१ गते र क्वाटरफाइनलको अन्तिम दिन असोज २२ गते भरतपुर फूटबल क्लब, चितवन र सुवर्ण युवा क्लब ठोरी–५ का बीच सेमिफाइनल प्रवेशका लागि भिडन्त हुने आयोजक समिति सदस्य सनम श्रेष्ठले जानकारी दिए ।
